@migu music@

Verjess Babylon - BAP

Written by：Wolfgang Niedecken

Er hatt die janze Woch jearbeid pausenlos

Daach un Naach un jrandios

Sich all die Bäum un Bloome övverlaat

Un Land un Meer un Birch jemaat

Er hatt die Sonn huh bovve fessmontiert

Un jääjenövver Mohnd un Stään fixiert

Die janze Diere hat e' enn zwei Daach paratjemaat

Un ohne Lieferschwierigkeite ahn dä Start jebraat

Dann ahm sechste Daach do saat e' sich Jenau

Jetz fählt nur noch Mann un Frau

Mann jing flöck dat met dä Ripp wohr kompliziert

Joot jejange nix passiert

Jetz looch dä Herrjott völlig fäädisch enn däm Himmelbett

Un kunnt nit schloofe weil e' spüre däät Do fählt noch jet

Er hätt sich hin un herjewälz ävver e' kohm nit drop

Bess dat dä Hahn jekräht denn drusse jing die Sonn ald op

Ja klar 'ne Hahn kräht die Koh määt Muh

Un dä Hungk dä bellt dozo

En Katz miaut der Löwe brüllt

Wenn ens jet nit läuf wie bestellt

Jesses nä die Minsche hann jo noch kein Sprooch

Da' 'ss mer irj'ndwie durchjejange letzte Woch

Also nix wie russ uss singem wärme Bett

Sechs Uhr wie e' zo sich säät

Verjess Babylon un dat met däm Turm

Jed Land kritt en Sprooch ein wöhr nit jenooch

Verjess Babylon Hillije Jeist un Jottes Sohn

Ejal wat et koss noch benn ich dä Boss

Also em Tiefflooch noch ens flöck enn jede Kontinent

Wobei e' ungerwähß sujar e' Veedelstündche pennt

Weil dissmohl Jott sei Dank un Miles More

E' Upgrade enn die Business Class drin wohr

Su krääte Eskimos un Inkas dat

Wodrop se schon ihr Levve lang jewaat

Die Chinese wollte 'n Sprooch die ohne R usskütt

Un die jeschrivve revolutionär usssieht

Kisuaheli Jamaikanisch un Sanskrit

Sprooche die mer nur 'm Himalaya versteht

Och Hebräisch Schwizerdütsch sujar Latein

Un ein für die enn Bahrain

Verjess Babylon un dat met däm Turm

Jed Land kritt en Sprooch ein wöhr nit jenooch

Verjess Babylon Hillije Jeist un Jottes Sohn

Ejal wat et koss noch benn ich dä Boss

Dä Tatort leef ald als dä Chef övver die Alpe kohm

Un sich paar Type enn 'ner Ledderbozz vüürnohm

Donoh die Hesse un die Sachse un et Schwabenland

Dann die Berliner un die Feschköpp vun der Waterkant

Nur für Hannover feel ihm nix Besondres enn

Un Düsseldorf maat suwiesu jar keine Senn

Un als e' selver zwei Minute vüür dä Jeisterstund

Duudmööd kaum noch schwaade kunnt

Troof e' zwesche Clodwigplatz un Sev'rinsbröck

Noch paar janz seltsame Lück

Die ahm Schunkle wohre stumm un stillverjnöösch

Met Pappnase em Jeseech

So Lück wesst ihr wat

Ich hann et jetz satt

Ich kann ech nimieh mir deit alles wieh

Sibbe Daach Akkord sujet jrenz ahn Mord

Wiesu sprecht ihr eijentlich nit einfach wie ich

Verjess Babylon Hillije Jeist un Jottes Sohn

Ejal wat et koss noch benn ich dä Boss